李樂詩博士 Dr. Rebecca Lee Lok Sze

極地科學工作者

2016-09-09

不知不覺開左學一個星期喇！唔知道大家適應左返學嘅節奏未呢？

之前就有人影到係開學日嘅時候，有小朋友個書包掛左棵蔥，估計應該係佢嘅屋企人取其諧音，希望佢聰明伶俐。

姑勿論，咁樣嘅做法有無根據，Jakal王淑儀我就覺得無論以咩形式送小朋友返學都好，能夠見証住佢地成長嘅重要里程碑已經係好溫馨嘅事。

不過，如果要送紅毛猩猩返學，就似乎唔係一件咁值得高興嘅事。
係婆羅洲就有一間綽號叫「森林學校」嘅保育中心，專門係收容紅毛猩猩，教佢地同同類社交，以及係野外生活嘅猩猩本能。

不過，送到去呢間學校嘅紅毛猩猩全部都係「孤兒」，佢地嘅媽媽多數都係被盜獵者或者伐林行動害死，所以保育人員先至要將佢地送到學校，教識佢地生存所需嘅技巧。只有猩猩bb學識自己築巢、搵野食同避開掠食者之後，就會將佢地放返去野外。

其實，自1970年代以來，婆羅洲既紅毛猩猩數量已經銳減左三分之二，係今年7月更被「國際自然保護聯盟」（The International Union for the Conservation of Nature）列為「極危物種」（Critically Endangered），僅次於最危險嘅級別 —「野外滅絕」（Extinct in the Wild）。

據了解，目前呢d猩猩最大嘅威脅，係為左生產紙張同棕櫚油嘅商業化伐林整地，嚴重咁破壞左佢地所棲息嘅雨林，單單係舊年砍伐同埋焚燒就夷平左260萬公頃的原始雨林。所以，「森林學校」嘅保育人員亦都表示，目前最大的問題就係幫學有所成嘅猩猩bb搵能夠野放嘅棲息地。

睇到呢到，可能您都會係度諗，遠在香港嘅我地，究竟可以點樣幫忙保育呢d紅毛猩猩呢？

或者，以下落黎呢位嘉賓分享佢係印尼棉蘭棕櫚樹林研究紅毛猩猩保育議題嘅故事可以俾大家作為其中一個借鏡，即刻交俾李樂詩博士仲有MiuMiu夏妙然，同我地今晚嘅嘉賓沈普仁同學暢談佢嘅體驗！

(照片由被訪者提供)