李樂詩博士 Dr. Rebecca Lee Lok Sze

極地科學工作者

2017-05-19

上次同大家分享過芬蘭堪稱全球首屈一指嘅教育制度，點樣令人趨之若鶩；今次就同大家分享下你可能不知芬蘭少女熱愛嘅活動 － 騎木馬跳高
你無聽錯，係騎木馬跳高！騎木馬跳高並唔係兩個活動，而係同一個活動，顧名思義就係騎住木馬跳高，講緊嘅木馬並唔係去主題公園玩嘅旋轉木馬，而係手攜式嘅木馬，即係有一個布製馬頭，附加一枝木棍作支撐，一般理解為係小朋友嘅玩具，但係對於芬蘭嘅女孩子黎講，騎木馬唔係遊戲，而係一種運動，佢地會花費無數時間練習，希望係騎木馬跳高嘅比賽之中展現技術同姿勢。

據估計，芬蘭有超過1萬名鍾意騎木馬跳高嘅女孩子，其中大多數是年齡介於12至18歲嘅青少年，但要從事呢一項活動，首先要有木馬。除左網購之外，芬蘭嘅女孩子更加會自己縫紉馬頭，再安置喺棍上。
有左呢隻木馬之後，就可以去參加正式嘅比賽。喺比賽嘅時候，參賽者係必須要跳過唔同高度嘅障礙物，有D更加高達1米，就好似騎住真嘅馬去跨欄咁樣。而佢地嘅步伐同姿勢，亦都係評分嘅標準之一，所以係需要大量時間練習。

不過，即使芬蘭有上萬人熱愛呢項活動，但大多數人都會將佢視為秘密，唔話俾其他人知。咁係因為仲有好多北歐國家嘅人將騎木馬視為幼稚嘅遊戲，以致參與呢項活動嘅人唔敢講出黎，以免成為被欺凌嘅對象。其實喜好呢樣野，本身根本無優劣之分，但好多時候對於陌生嘅事物，我地都會因為唔夠認識而妄下判斷，所以遊學正正是一個好機會，讓大家可以認識唔同嘅文化，就好似以下落黎同李樂詩博士& MiuMiu夏妙然分享嘅Ashley陳詠宜同學咁，去完芬蘭唔單止更了解當地文化，仲對自己作息安排都有新嘅諗法！即刻聽下佢嘅分享丫！