李樂詩博士 Dr. Rebecca Lee Lok Sze

極地科學工作者

2017-08-11

問下大家一個問題，如果每個月唔洗做野都可以有一筆固定嘅收入，足以支付基本生活所需，咁你覺得你仲會唔會想返工呢？

問大家呢條問題並唔係一時興起，而係同今晚去遊學聽我講嘅地方—芬蘭好有關係，因為今年芬蘭展開左一項歷史性嘅社會福利實驗，喺無任何附帶條件下，為2000名隨機挑選、年齡介於25-58歲嘅失業人士，每個月提供一筆大約5000港元嘅「基本收入」，去支付基本生活所需。呢筆錢會取代其他社會福利金，即使日後佢地搵到工，仍然可以持續收到呢筆款項。

實驗為期兩年，首要目的係促進就業！聽起上黎可能有D匪夷所思，唔做野都有錢收，點解可以鼓勵到人去搵工做呢？但係芬蘭政府認為咁樣喺某程度上係可以令更加多人願意投入勞動市場，原因係喺現有嘅政策底下，一旦失業嘅人搵到工，即使只係臨時工，佢所領取嘅救濟金都可能會減少，變相降低左失業人士搵工嘅動力。所以，如果無論有工做定無工做都有一筆基本收入，咁就唔會再有人為左失業救濟金而唔搵工做。

其實，近年黎，基本收入已經逐漸成為左世界一股新趨勢。瑞士舊年亦都曾經考慮引進，打算每月提供俾成年公民相當於接近20000港元嘅保證收入，但瑞士人公投否決左相關計畫。而蘇格蘭、加拿大、冰島、烏干達周巴西都有討論推出類似嘅方案。

聽到呢到，大家可能都會有個疑問，既然錢會自動到手，人唔係應該會變得更懶散？會放棄工作？點解呢個「基本收入」嘅福利政策，好似完全無考慮過人係有惰性呢一面呢？

之不過，人之所以唔想返工，係真係因為懶，定還是可以提供基本收入嘅個份工根本上唔係自己嘅興趣，而有興趣嘅工又未必可以足夠基本收入呢？又或者，換個問法，假設你唔需要為左賺取生活費，而勉強去接受唔適合或者無太大興趣嘅工作，可以根據自己嘅興趣同能力投身相應嘅行業，你又肯唔肯定你會揀返依家呢份工去做呢？

未有答案，唔緊要，因為芬蘭嘅研究都係剛剛開始，兩年後，答案或者會更清晰：至於自己心底裡面嘅答案，當然要靠自己尋找，去遊學就係尋找自己嘅好方法。唔知呢位嘉賓去到芬蘭遊學又搵唔搵到自己想搵嘅野呢？聽下李樂詩博士&MiuMiu夏妙然同今晚嘅嘉賓蔡惠嫻同學傾下佢喺芬蘭遊學嘅體會啦！

(照片由被訪者提供)

黎到芬蘭，除左學芬蘭語，當然亦要睇極光啦！